Դեսպան Տիգրան Բալայանը մասնակցեց «West–East Bridges» հիմնադրամի նախաձեռնած համաժողովին

19 հուլիսի, 2022

Հուլիսի 19-ին դեսպան Տիգրան Բալայանը մասնակցեց «West–East Bridges» հիմնադրամի կողմից Արևելյան գործընկերության և ԵՄ անդամ երկրների համար կազմակերպված երիտասարդական համաժողովին, որին մասնակցում էին Հայաստանը, Գերմանիան, Իսպանիան, Հունաստանը, Նիդերլանդները, Լատվիան, Մոլդովան, Վրաստանը և Ուկրաինան ներկայացնող երիտասարդներ։

Համաժողովի ընթացքում ելույթներով հանդես եկան Հայաստանի, Վրաստանի և Մոլդովայի դեսպանները՝ ներկայացնելով իրենց երկրների արտաքին քաղաքական և անվտանգային խնդիրներն ու առաջնահերթությունները, հակամարտությունների կարգավորման տեսլականները, նոր տիպի կորոնավիրուսի համավարակի ազդեցությունն իրենց երկրների վրա, համավարակի հետևանքների հաղթահարման փորձը։

Իր ելույթում Հայաստանի դեսպանն անդրադարձել է 2020թ․ կորոնավիրուսի համավարակի պայմաններում Ադրբեջանի կողմից Արցախի դեմ սանձազերծված ագրեսիային, դրա պատճառներին ու հետևանքներին, մարդու իրավունքների և միջազգային մարդասիրական իրավունքի կոպիտ ոտնահարումներին:

Դեսպան Բալայանն իր խոսքում ներկայացրել է Հայաստանի իշխանությունների կողմից տարածաշրջանում խաղաղության մթնոլորտի հաստատմանն ուղղված ջանքերը՝ ընդգծելով, որ հակամարտությունների կարգավորման հարցում կարևոր է երկխոսությունը և դիմացինի դիրքորոշումների ընկալումը։

Ելույթներից հետո դեսպանները պատասխանել են մասնակիցների հնչեցրած բազմաթիվ հարցերին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր